பாலனின் மனைவி

அலுவலகத்தின் லஞ்ச் டைம் சாப்பிட்டுக் கொண்டே.....

பாலன் ஸார் இந்த ஆஃபீஸுல எத்தனை வருசமா வேலை செய்றீங்க ?

பதினெட்டு வருசம் ஆச்சு என்ன விசயம் திலீபன் திடீர்னு...

நான் இங்கே வந்து ஏழு வருசம் ஆச்சு எனக்குத்தெரிய நீங்க லஞ்சம் வாங்கியதே இல்லை இது எப்படி சார் சாத்தியம் ?

எனது மனைவிதான் காரணம்.

என்ன சார் மனைவிக்கு பயந்துக்கிட்டு லஞ்சம் வாங்காமல் இருக்கலாமா ? இதை எதுக்காக வீட்டுக்கு தெரியப்படுத்துறீங்க ?

திலீபன் நான் சொன்னதை தப்பா புரிஞ்சுக்கிட்டீங்க... எனக்கு தேவைகள் அதிகம் இல்லை எனது மனைவி அவசியமில்லாத விசயங்களுக்கு ஆசைப்பட மாட்டாள், கொடுப்பதை வைத்து குடும்பம் நடத்துவாள், இன்றைக்கு இந்த ஆஃபீஸுலயே லஞ்சம் வாங்காத ஒரே ஆஃபிஸர்னு நான் பெயர் எடுத்து இருக்கேன்னா.... அதுக்கு எனது மனைவிதான் காரணம்.

என்ன சார் நீங்க... அப்புறம் எப்படி நாமலும் பணக்காரன் ஆவது... ?

எதுக்காக ஆகணும் ?

என்ன சார் கேள்வி இது ?

சொல்லுங்க திலீபன் எதுக்காக பணக்காரன் ஆகணும் ?

பணக்காரன் ஆனால்தானே நிறைய இடங்கள் வாங்கிப் போடலாம் ஊரு உலகம் நம்மளையும் மதிக்கும்.

இப்ப நமக்கு வீடு இல்லையா... சமூகத்துல மரியாதை இல்லையா ?

இருக்கு...... சார் இருந்தாலும்.... பெரிசா... எதிர் பார்ப்பது குற்றமில்லையே... ?

திலீபன் நான் சவால் விடுறேன் இன்றைக்கே நானும் லஞ்சம் வாங்கி நாளைமுதல் உங்களைப்போல பெயரெடுக்க முடியும், ஆனால் உங்களால என்னைப்போல லஞ்சம் வாங்காத ஆஃபிஸர்னு பெயரெடுக்க முடியுமா ?

என்ன சார்.... நீங்க... அதுசரி நீங்க மட்டும் எப்பொழுதுமே சிரிச்ச முகத்தோட இருக்கீங்களே... ஆஃபீஸுக்கு லீவும் போடுறது இல்லை இது எப்படி ?

வாங்க திலீபன் சரியான இடத்துக்கு நீங்களே வந்துட்டீங்க.... இதுக்குத்தான் நான் சுற்றி வளைத்து பேசினேன் உங்களுக்கு என்னை விட அதிகம் ப்ராபர்ட்டி இருக்கு ஐந்து வயசுல ஒரே மகன் மட்டும்தான் அதிகமாக லீவு எடுக்கறீங்க, மனைவிக்கு முடியலை, மகனுக்கு ஸ்கூல் சீட்டு வாங்கணும், பக்கத்து வீட்டுக்காரியோடு மனைவி சண்டை போட்டாள், ஆஸ்பெட்டல் போகணும், வாங்கிப்போட்ட இடத்தை ஒருத்தன் ஆக்கிரமிச்சுக்கிட்டான், வாங்கிய இடத்தில் மோடி வந்துட்டான். மோசடி செய்துட்டான், வாடகைக்கு விட்ட வீட்டை ஒருத்தன் காலி பண்ண மாட்றான் இப்படி ஏதாவது காரணத்துல லீவு எடுக்கிறீங்க.... மேனேஜர் சத்தம் போடுறாரு, அந்தக் கோபத்தை மற்ற ஸ்டாஃப்களிடம் காண்பிக்கிறீங்க, இதெல்லாம் எனக்கு இருக்கா ?

என்ன சார் இவ்வளவு சொல்றீங்க ?

முதல்ல எனது கேள்விக்கு பதில் சொல்லுங்க ?

அது வந்து...

நான் சொல்றேன் நமது ஆசைகள் கூடும் பொழுதுதான் நமக்கு பணத்தேவைகள் அதிகமாகுது என்னைப் பாருங்கள் பாரம்பரியமாக எங்கள் தாத்தா கட்டிய வீடு, பிறகு நான் சம்பாரித்து மகளை கல்யாணம் செய்து கொடுத்து விட்டேன். என்னாலான ஒரு இடமும் மகனுக்கு வாங்கிப்போட்டு விட்டேன் மகன் காலேஜ் முடிந்து வேலை தேடிக்கொண்டு இருக்கின்றான் எனது மனைவிக்கு அவசியமான நகைகள் வாங்கி கொடுத்து விட்டேன் சந்தோசமான மனைவி, மக்கள் ஆஃபீஸ் முடிந்ததும் மனைவி, மக்களோடு சந்தோசமாக பேசுவேன், விளையாடுவேன், சினிமாவுக்கு கூட்டிப் போவேன், வருசத்துக்கு ஒருமுறை சுற்றுலா போவோம் இந்த வயசுலகூட நாங்கள் வீட்டுக்குள்ளே குடும்பத்தோடு ஓடிப்பிடிச்சு விளையாடுவோம், இது பரந்த உலகம் ஆனால் இதற்குள் எனக்கென்று ஒரு சிறிய உலகம் இருக்கு எனக்கு எந்த கவலைகளும் இல்லை, எல்லோரிடமும் அன்பாக பேசுவேன் ஆகவே எனக்கு எதிரிகளும் இல்லை, நீங்க எப்பப் பார்த்தாலும் பணம் பணம்னு வேலை முடிந்ததும் அந்த பிசினஸ், கமிஷன் அது இதுனு ஓடுறீங்க... ஆனால் சந்தோசமாக வாழுறீங்களா ? இல்லைனு எனக்கு தெரியும் நான் அடுத்தவங்க பணத்துல இதுவரை வாழவில்லை இனிமேலும் இப்படித்தான் நமக்கு நமது வருமானம் எவ்வளவோ அதற்குள் வாழ்க்கையை  நடத்தப்பழக வேண்டும் லஞ்சம் வாங்குகின்றீர்களே.... யாராவது ஒரு மனுசன் சந்தோசமாக கொடுத்ததாக சொல்லச் சொல்லுங்க பார்க்கலாம் வயிறெரிஞ்சுதான் கொடுப்பாங்க, அதனால்தான் இன்றைக்கு பணிமிருந்தும் பலர் சிரமப்படுறாங்க இதுதான் உண்மை நியாயமாக வாழ்ந்தால் போதும் செய்வதெல்லாம் செய்துட்டு இதுல நீங்க எல்லா வருசமும் ஐயப்பன் கோயிலுக்கும் போயிட்டு வர்றீங்க.... அந்தச்செலவு பணங்கள் அனைத்துமே உங்களது உண்மையான உழைப்பா ? நான் கோயிலுக்கெல்லாம் அடிக்கடி போறது இல்லை, எப்பவாவது மனைவி அழைத்தால் போவேன் அதற்காக கடவுள் இல்லை அப்படினு சொல்ல வரலை திலீபன் நீங்க கேட்தற்காக இவ்வளவு விபரம் சொன்னேன் மற்றபடி உங்கள் மனதை காயப்படுத்த நினைக்கலை ஐயாம் வெரி ஸாரி...

இல்லை சார் எல்லாமே சரியாகத்தான் சொன்னீங்க.....

சற்று நேரம் அமைதியாக சாப்பிட்டுக்கொண்டு இருந்தனர்

ஸார் கேட்டால் தப்பா நினைக்க மாட்டீங்களே.... ?

இல்லை கேளுங்கள் திலீபன்.

இவ்வளவு காலமும் உங்களது மனைவியை சந்தோசமாகத்தான் வைத்திருக்கோம்னு நீங்க உறுதியாக நம்புறீங்களா ?

ஆமா இதிலென்ன சந்தேகம் ?

உங்கள் மனைவியிடம் இதைப்பற்றி கேட்டு இருக்கீங்களா ?

இ....ல்லை.... ஆனால் அவ என்னோடு சந்தோசமாகத்தான் இவ்வளவு காலமும் வாழ்ந்திருக்கா...

சரி ஸார் ஏதோ கேட்கணும் தோணுச்சு அதான் இனி நானும் முயல்வேன் ஸார் உண்மையிலேயே பணம் சேரச் சேரத்தான் எனது நிம்மதி குறைஞ்சுக்கிட்டு வருது அது எனக்கும் இப்போ புரியுது.

நல்லது திலீபன்.

இருவரும் கைகளை கழுவி விட்டு மீண்டும் டேஃபிளுக்கு வந்தார்கள் பாலனுக்கு, திலீபனின் கேள்வி மனைதை குடைந்து கொண்டே இருந்தது.

நாம் செல்வியை சந்தோசமாகத்தான் வைத்திருக்கின்றோமா ? அவளிடம் இதைப்பற்றி இதுவரை கேட்கவில்லையே.... ஏன் மறந்தோம் ? ஆனால் அவள் நாம் வீட்டுக்கு போனதும் சந்தோசப்படுவாளே சிரித்த முகத்துடன் காஃபி போட்டுத்தருவாளே.... குழந்தைகளை வைத்துக்கொண்டு நம்மை காலை வாரிவிடுவதில் அவளுக்கு அலாதியான சந்தோசம் இருக்குமே... எத்தனை முறை கண்டு இருக்கின்றோம் எதற்காகவும் நம்மிடம் அவள் சலிப்பு காட்டியதில்லையே..... இதெல்லாம் நடிப்பா ? ச்சே அப்படி இருக்காது நடிக்க வேண்டிய அவசியம் மனக்குழப்பம தீர்க்க வேண்டுமே இன்றே ஏன் ? இப்பொழுதே கேட்டால் என்ன ?

மணி பார்த்தார் 3:25 pm உடன் மேலாளர் அறைக்கு சென்றவர் அவசர வேலையாக வீட்டுக்கு போகணும் இதுவரை கேட்காதவர் இன்று கேட்கின்றார் உடன் அனுமதி கிடைத்தது தனது பைக்கில் வீட்டுக்கு புறப்பட்டார்.

தொடரும்...