கிஸ்ஜியானந்தா

ஃப்ரான்ஸ் கில்ஜியானந்தா ஆஸ்ரமத்தின் முகப்புறத் தோற்றம்.

இப்பதிவின் முதல் பகுதியை படித்து விட்டு தொடர கீழே சொடுக்கவும்.

கிஸ்ஜி ப்ரமோதா முஷாபி நமீந்ராயணா யாஹூஜி

அடுத்த பௌர்ணமிவரை மல்லிகாவும், மஞ்சுளாவும் கணவர்களுக்கு தெரியாதவாறு ஸ்வாமிஜியைப் பற்றியே பேசிக்கொண்டு இருந்தார்கள் அந்த வெள்ளிக்கிழமை வந்தது காலையிலேயே குளித்து முடித்து கணவனுக்கு தோசை வார்த்துக் கொண்டு இருந்த மல்லிகாவை கணவன் சன்னாசி அவசரமாக அழைத்தான்.

அடியே மல்லிகா சீக்கிரம் வா டிவியைப்பாரு... நம்ம ஊரு ஸ்வாமி கிஸ்ஜியானந்தாவை போலீஸ் அரஸ்ட் பண்ணி பிடறியில அடிச்சுக் கூட்டிப்போறாங்க... கூடவே சீரியல் நடிகை சீலாவும் எல்லாம் மேற்படி கேஸட்டாம் பாரு 150 பேருடைய கேஸட்டுகள் சிக்கி இருக்காம், நம்ம ஊருக்காரிகள் எவ, எவ மாட்டப் போறாளுகளோ... புருஷனுக்குத் தெரியாமல் போனவளுகளா இருக்கும் வேணும், வேணும் இவளுகளை வெளக்கமாத்தால அடிக்கணும் போறவளுக புருஷனைக் கூட்டிக்கிட்டு போகவேண்டியதுதானே... ஹூம் கொஞ்ச நாளைக்கு ஊருல நல்லா கேஸட் வியாபாரம் ஓடும் எவனெல்லாம் தூக்கு மாட்டிக்கிட்டு சாகப்போறானோ... பாவம்.

கணவன் சொல்லச் சொல்ல மல்லிகாவுக்கு அடி வயிற்றைக் கலக்கியது, மகனிடம் சொல்லி அடுத்த வீட்டு மஞ்சுளாவை அழைத்து வரச்சொல்ல அவள் வரவும் சன்னாசி சொன்னான்.

வாங்க மதினி சாமியாரை பார்த்தீங்களா... இப்ப இந்த பொம்பளைங்க எல்லாம் சாணியை எடுத்து மடத்துக்குள்ளே அடிக்கிறாங்களே... இவங்களுக்கு மொதல்ல புத்தி எங்கே போச்சு ?

மல்லிகாவும், மஞ்சுளாவும் ஒருவரையொருவர் பார்த்துக் கொண்டார்கள் என்ன பேசமுடியும் ? மஞ்சுளாவின் மனக்கண்ணில் கிஸ்ஜியானந்தா - மேகலா கேஸட் நிழலாடிய''தூ''....

என்ன மதினி இப்படி பேயறைஞ்சது மாதிரி நிற்கிறீங்க ?

இல்லை... அது வந்து என்னோட ஃப்ரண்டுகூட ஸ்வாமிஜியை பார்க்க போகணும்னு சொல்லிக்கிட்டு இருந்தாள்... அதான்...

இன்னும் போகலையே.... ஆமா யாரு ?

அது வந்து... மல்.... மல்... இல்லை மரகதம் இன்னும் போகலை.

நல்லவேளை தப்பிச்சாங்க.... எந்த சாமி செஞ்ச புண்ணியமோ... போங்க.

மல்லிகாவுக்கு ஒருநொடி இதயம் நின்று ஓடியது நல்லவேளை நம்ம பெயரைச் உளறலை மனதுக்குள் வேண்டிக் கொண்டாள்.

''ஆத்தா வடக்குத்தெரு மகமாயி நல்லவேளை எங்களைக் காப்பாத்தினே... இன்றைக்கு ஒருநாள் தாமதிச்சு இருந்தால் எங்களோட நிலைமை ? இந்த வருஷம் களரிக்கு எம் புருஷனை அலகு குத்தி உனக்கு தேர் இழுக்க வைக்கிறேன் எல்லோரையும் நீதான் காப்பற்றணும் தாயி''

முற்றும்.

 

Chivas Regal சிவசம்போ-

இவ செஞ்ச தப்புக்கு அவன்தான் அலகு குத்திக்கிறணுமா ?

சாம்பசிவம்-

யார் குத்தினால் என்ன ? ஆத்தாளுக்கு நேர்த்திக்கடன் நிறைவேறினால் சரி.

சிவாதாமஸ்அலி-

வில்லங்கத்தார் யோசனையை கேட்டால் இப்படித்தான்.