ரத்தக்களரி

       ஊரில் திருமணம், காதுகுத்து, சடங்கு மற்றும் அப்பத்தாவின் ஏழாம் ஆண்டு நினைவு நாளுக்குகூட வாழ்த்து பதாகைகள் வைக்கப்படுவது இன்று கட்டாய சடங்காக ஆக்கப்பட்டது இதில் தங்களது சொந்த பணத்தை செலவு செய்பவர்கள் பெரும்பாலும் தங்களது கட்சித்தலைவரின் படம் அல்லது தங்களது அபிமான திரைப்படக் கூத்தாடியின் படத்தை அச்சடித்தே வைக்கின்றார்கள். அதேநேரம் பணம் செலவு செய்த முடுமைகளின் முகங்கள் கீழே ஓரத்தில் அவர்களது மண்டை மட்டும் தெரிவது போல் இருக்கும்.

இதில் அந்தக் கூத்தாடியின் கையில் அருவாள் பிடித்து ரத்தக்களரியோடு நிற்பான் அது அவன் ஏதோவொரு திரைப்படத்தில் சமூகத்தை காப்பாற்றுவதற்காக அருவாளை தூக்கி நின்றபோது எடுத்தகாட்சி. அல்லது மற்றொரு கூத்தாடி துப்பாக்கியை பிடித்து திருமணத்துக்கு வருபவர்களை சுடுவது போன்று குறிபார்த்து நிற்பான். இப்படி பதாகையை கண்டு திருமணத்துக்கு வந்து திரும்பி போன ஆஸ்திரேலியாக்காரர்களும் உண்டு.

நான் தெரியாமல்தான் கேட்கிறேன் ஏண்டா.... நாசமாப் போறவெய்ங்களா... திருமணம் என்பது இரண்டு உள்ளங்கள் வாழ்க்கையில் இணையும் பெருவிழா அதில் போய் அபச குணமாக கத்தி, அருவாள், கோடரி, கம்பு, செயின், துப்பாக்கினு ஆயுதங்களை பிடிப்பது போன்ற பதாகைகளை வைக்கிறீங்களே... உங்களது பெற்றோர்களும், ஆசிரியர்களும் உங்களுக்கு கற்றுக் கொடுத்த பாடம் இதுதானா ?  ஏண்டா இப்படி அடி முட்டாளாக இருக்கீங்க ?

ஒரு விசயம் தெரியுமாடா ?  இதே பதாகைகள் அடுத்த வாரம் வீடு இல்லாதவர்கள் சாலையோரத்தில் தங்களது குடிசை போன்ற கூடாரத்துக்கு மேலே போட்டு மூடி இருப்பார்கள். அல்லது வீடு இருந்து கழிவறை இல்லாதவர்கள் ஒதுங்குவதற்கு வீட்டோரமாக சதுரமாக கட்டி வைத்து இருப்பார்கள். உங்களது அபிமான நடிகர்களின் முகத்தில் சிறுநீர் அபிஷேகம் ஆறு வேலையும் நடக்கும். எப்படியோ இல்லாதவர்களுக்கு உங்களது செலவுகள் பிறகு பயனாகிறதே அதற்காக உங்களுக்கு நன்றி சொல்லலாம்.

மேலே பதாகை இருக்கிறதே... பார்த்தீர்களா ?  தி கிரேட் தேவகோட்டையில் நிகழ்ந்த திருமணத்துக்கு வந்த நண்பர் வாழ்த்தி இருக்கிறார் இவர்கள் நண்பர்கள் இதைப் பார்த்தாவது திருந்துங்க....

ChavasRegal சிவசம்போ-

தேவகோட்டையில் எல்லா திருமண பதாகைகளும் இப்படியிருந்தால் நலம்.