மனிதன் மாற்றி விட்டான்

காலம் மாறி விட்டது என்று சொல்வது முறையா ? காலம் எப்படி மாறும் ? உலகம் தோன்றியதிலிருந்து சூரியன் கிழக்கில் உதித்து மேற்கில் மறைகிறது நிலவு வருகிறது போகிறது, மழை பொழிகிறது நிற்கிறது. இந்த சுழற்சி முறையில் மாற்றம் இல்லையே... பிறகு மனிதன் ஏன் இப்படி பொய் சொல்கின்றான் ?
 
அன்று
மணமக்கள் பெரியோர்களின் காலில் விழுந்து ஆசீர்வாதம் வாங்குவது மிகப்பெரிய மரபாக இருந்தது. இதில் மணமக்களுக்கு முட்டி வலி வருவதும் உண்டு ஆயினும் அனைவரிடமும் காலில் விழுந்தாக வேண்டும்.
 
இன்று
மணமக்கள் அலங்கார நாற்காலிகளில் அமர்ந்து இருக்க பெரியவர்கள் நின்று கொண்டு ஆசீர்வாதம் வழங்குவதும், அருகில் நின்று கொண்டு புகைப்படங்கள் எடுப்பதும் முறையாக இருக்கிறதா ?  
 
அன்று
திருமண வேலைகளும், தோரணம் கட்டுவதும், சடங்கு சம்பிரதாயங்கள் செய்யவும், பந்தியில் உறவுகளும், நட்புகளும் முக மலர்ச்சியோடு விருந்து பறிமாறுவார்களே...
 
இன்று
கேட்டரிங் என்ற பெயரில் அவனுக்கு பணத்தை கட்டி எவன், எவனோ கடமைக்கு சோறு போடுகின்றார்களே... அதிலும் அசைவம் போடவில்லை எனில் திருமணத்துக்கே வராதவர்களும் பெருகி விட்டனரே...
 
அன்று
மரணம் நிகழ்ந்து விட்டால் உறவினர்கள் பேருந்திலிருந்து இறங்கி வீடு வரையில் வீதியில் கதறிக் கொண்டே வந்து சடலத்தின் மீதி விழுந்து கதறி அலறுவார்களே...
 
இன்று
மகிழுந்திலிருந்து இறங்குகின்றனர், வந்து இறந்தவருக்கு உரிமைப்பட்டவரின் கையில் சம்பிரதாயத்துக்கு கை கொடுத்து விட்டு, அல்லது வணங்கி விட்டு, உள்ளே சென்று மாலையை போட்டு விட்டு வெளியில் வந்தவுடன் மற்ற உறவுகளைக் கண்டு கை கொடுத்து சிரித்து பேசுகின்றார்களே...
 
அன்று
இறந்தவரின் சடலத்தை தூக்குவதற்கும், குளிப்பாட்டுவதற்கும், சடங்கு முறைகள் செய்வதற்கும் உறவுகளும், நட்புகளும் போட்டி போட்டு உதவுவார்களே...
 
இன்று
யாருமே முன் வருவதில்லை என்பதைவிட எந்த முறைகளும் தெரிந்து கொள்ளவில்லை என்பதே உண்மை. ஏதோ கடமைக்காக வந்து விட்டேன் என்பதை தெரியப்படுத்துவதற்கு வருகின்றார்கள் அவ்வளவே...
 
அன்று
பாடையில் கட்டி, சுடுகாடு ஐந்து மைலில் இருந்தாலும் உறவுகளும், நட்புகளும் மாற்றி, மாற்றி தூக்கிச் செல்வார்களே... மேலும் மௌனமாக நடந்து வருவார்களே...
 
இன்று
சுடுகாடு ஒரு மைல் தூரமாக இருந்தாலும் அமரர் ஊர்தியை வாடகைக்கு எடுத்து அதில்தான் ஏற்றிச் செல்கின்றார்கள், மேலும் குத்தாட்டம் ஆடுவதற்கு மகிழ்ச்சியாக மது அருந்திய கூட்டம் கண்டிப்பாக வருகின்றார்களே...
 
அன்று
இரண்டாம் நாளும் உறவுகளும், நட்புகளும் சுடுகாடு சென்று பாலூற்றி காரியம் செய்து வந்தார்களே... ஒரு வாரமும் உறவினர் கூட்டம் இருந்ததே...
 
இன்று
முதல்நாளே இரண்டாம் நாள் காரியம் என்று புதைத்த அரை மணி நேரத்தில் பாலூற்றி வேலையை முடித்து விடுகின்றார்களே... அப்படி இவர்கள் சாதிக்கப் போவதுதான் என்ன ?
 
நண்பர்களே... இதை செய்தது காலமா ? அல்லது சடங்குகளை மாற்றி விட்டு காலத்தின்மீது பழி போடும் அறிவு மழுங்கிப் போன மனிதனா ?
 
கில்லர்ஜி தேவகோட்டை

Share this post with your FRIENDS…