பாட்டு ஒன்னு நான் பாடட்டுமா ?

 

எதிர்காலம்
ரயிலில் இருக்கை எண்ணைப்
பார்த்து அமர்ந்தேன் செல்லில்
ஒளிமயமான எதிர் காலம்
பாடல் ஒலித்ததால் போகும்
காரியம் ஜெயம் என்ற உணர்வு.
 
கப்-சிப்
விமானத்தில் பக்கத்து இருக்கையில்
இருந்த அழகியை பார்த்து அசந்தேன்
நான் கொடுக்கட்டுமா அதை உனக்கு
என்று பாட நினைத்தேன் கையில்
நூல் தலைப்பில் ரிவால்வர் ரீட்டா.
 
சிரிப்பு
பேருந்தில் ஏறினேன் நடத்துனர்
எங்கே போகணும் என்றபோது
போகுமிடம் வெகு தூரமில்லை
என்ற பாடல் ஒலித்ததால்
இருவரும் சிரித்து விட்டோம்.
 
திருமணம்
திருமண வீட்டில் தடபுடலாக
எல்லோரும் வேலை செய்தனர்
வாராயோ தோழி வாராயோ
என்ற பாடலோடு மணமகளை
அழைத்து வந்தனர் தோழியர்கள்.
 
ஆண்டுவிழா
கல்லூரியில் இறுதியாண்டு விழா
மாணவர்கள் கவலையாக இருக்க
பசுமை நிறைந்த நினைவுகளே
என்ற பாடலை பாடகர் பாலா
பாடியபோது மனம் கனத்தது.

 

மழை
காலை வீட்டிலிருந்து கிளம்பினேன்
வானம் ஓசையோடு பயமுறுத்தி
மழை வருது குடை கொண்டு வா
என்று பாடியது போலிருந்ததால்
உள்ளே போய் குடை எடுத்தேன்.
 
சிறுக்கி
குழாயடியில் பெண்கள் குடுமி
பிடித்து சிறுக்கி மவளே என்றபோது
சிறுக்கி சிறுக்கி மக சீனாத்தானா
என்று பாட்டு கல்யாண வீட்டு
குழாயில் சத்தமாக ஒலித்தது.
 
கடவுள்
சாலையில் நடந்து சென்ற இருவர்
கடவுள் இல்லை என்று பேசினார்கள்
கல்லை மட்டும் கண்டால் கடவுள்
என்று மற்றவர் பாடிக் காட்டியதை
கேட்டு சிரித்து கடந்து விட்டேன்.
 
வாழ்க்கை
அந்த வீட்டில் ஒப்பாரிச் சத்தம்
உறவினர்கள் வரிசையாக வந்தனர்
ஆடி அடங்கும் வாழ்க்கையடா...
ஒலி பெருக்கியில் வரப்போகும்
பணத்துக்காக அலற விட்டான்
 
மரணம்
காலையில் தேதியை கிழித்தேன்
அது சற்றே சிரிப்பது போலிருந்தது
ஏன் சிரித்தாய் என்னைப் பார்த்து
என்று கேட்டேன். உன் மரணநாளை
நெருங்குகிறாயே... அதனால் என்றது.
 
கில்லர்ஜி அபுதாபி
 
Chivas Regal சிவசம்போ-
இந்த ஆளு ஏழரையை இழுத்து விடுவாரோ...