பொன்மொழியும், என் வழியும்

வறுமை வந்தால் வாடாதே
வசதி வந்தால் ஆடாதே
 
நான் வசதியில் ஒருக்காலமும் ஆடியதில்லை ஆனால் வறுமையில் வாடி இருக்கிறேன் காரணம் நான் வசதியிலும் வாடிக் கொண்டுதான் வாழ்கிறேன் இது எனது சாபக்கேடு போலும்.
* * * * * * * * * * 01 * * * * * * * * * *
 
கடலளவு கிடைத்தாலும் மயங்க மாட்டேன் – அது
கையளவே ஆனாலும் கலங்க மாட்டேன்.
 
நான் ஒருக்காலமும் பணத்தை கண்டு மயங்கியதில்லை, ஆனால் கடலளவை கையளவு ஆக்கி விட்டார்களே எனது அறியாமையால் என்று கலங்கி இருக்கிறேன்.
.* * * * * * * * * * 02 * * * * * * * * * *
 
வாழுகின்ற மக்களுக்கு வாழ்ந்தவர்கள் பாடமடி
பெற்றவர்கள் பட்டகடன் பிள்ளைகளை சேருமடி
 
வாழ்ந்தவர்களை பாடமாக்கி கொள்வதில் தவறில்லை, ஆனால் அவர்கள் பெற்ற கடனை பிள்ளைகள் தலையில் சுமற்றுவதில் உடன்பாடு இல்லாதவன் நாம். யாருடைய பெருமைக்காக பெற்றோம் ?
* * * * * * * * * * 03 * * * * * * * * * *
 
ஊருப்பய காசெடுத்து உம்மாவுக்கு பாத்தியா ஓதுனானாம்
(கடைத் தேங்காயை எடுத்து வழிப்பிள்ளையாருக்கு உடைத்தானம்)
 
நான் ஒருக்காலமும் இப்படி செய்ததில்லை எனது உழைப்பில் எனது தகுதிக்குக்குள் கட்டுப்பட்டதை தர்மம் செய்து இருக்கிறேன். இதை இறுதி வரையில் தொடர்வேன் இறை செயலால்.
* * * * * * * * * * 04 * * * * * * * * * *
 
நமக்கு தவறிழைத்தவர்களை
மறப்போம் மன்னிப்போம்.
 
தவறுகளை மறப்போம் என்ற கொள்கையாளன் நான், ஆம் எனது வாழ்வில் இவர்கள் என்றுமே இல்லை. ஆனால் மன்னிப்பு என்பது வருந்தியவர்களுக்கு கொடுக்கலாம், திருந்தியவன் வருந்தி இருக்கவேண்டும்.
* * * * * * * * * * 05 * * * * * * * * * *
 
வாழ்க்கை என்பது நீ சாகும் வரை அல்ல...
மற்றவர்கள் மனதில் நீ வாழும் வரை...
 
இது எனக்கு பொருத்தமில்லாத தத்துவம் காரணம் நான் யாருடைய மனதிலும் இருப்பதாக தெரியவில்லை. காரணம் என்னால் பலன் அடைந்தவர்கள் நன்றி கெட்டவர்கள் மட்டுமே...
* * * * * * * * * * 06 * * * * * * * * * *
 
கெட்டவன் சாகும் போதுதான் கஷ்டப்படுவான்
நல்லவன் சாகுற வரைக்கும் கஷ்டப்படுவான்.
 
இது பலர் மனதையும் மாற்றி விடும். ஆனால் எனக்கு பொருந்தியதாக இருக்கிறது காரணம் இவ்வளவு காலமும் எனது மனம் அமைதி பெறவில்லையே... இனிமேல் வந்துதான் என்ன... ?
* * * * * * * * * * 07 * * * * * * * * * *
 
நல்ல நண்பர்கள் உள்ள எவனும்
வாழ்க்கையில் தோற்றுப் போகமாட்டான்
 
ஆம் உறவுகள் அனைத்தும் துரோகித்து இருந்தும், நான் வாழ்க்கையில் இன்னும் முழுமையாக தோற்றுப் போகாததற்கு காரணம் எனது உண்மையான நண்பர்கள் மட்டுமே...
* * * * * * * * * * 08 * * * * * * * * * *
 
பெயரை கேட்டால்கூட ஞாபகம் வராமல் மறக்க வேண்டும்
பாசம் என்று வேஷம் போட்ட துரோகிகளை.
 
ஆம் நான் இறைவனிடம் வேண்டுவது இதுவும்தான் எனக்கு மறக்கும் ஆற்றலைக்கொடு மிச்சமுள்ள காலமாவது நான் ரத்த உறவுகளை மறந்து மகிழ்ச்சியாக வாழவேண்டும்.
* * * * * * * * * * 09 * * * * * * * * * *
 
ஒவ்வொரு மனிதனும் மாறித்தான் போகின்றனர்
பழகும் போதும்...பழகிய பின்பும்...
 
ஆனால் என்னால் இப்படி மாற முடிவதில்லையே... இறைவா துரோகம் மட்டுமே  செய்யும் மனிதர்களுக்கு மத்தியில் இன்னும் எவ்வளவு காலம்... ?
* * * * * * * * * * 10 * * * * * * * * * *
 
இவர்கள்தான் நல்ல உறவு என்று நம்பும் நேரத்தில் நாங்கள்தான்
நல்ல நடிகர்கள் என்று நிரூபித்து விடுகின்றனர் பலர்.
 
ஆம் நானும் இப்படித்தான் நடிகர்கள் என்பது அறியாமல் அவர்களோடு ஒன்றி விடுகிறேன். அவர்களின் உண்மை முகம் தெரியும் போதுதான் அந்த ஏமாற்றத்தின் வலி புரிகிறது.
* * * * * * * * * * 11 * * * * * * * * * *
 
நடிக்கத் தெரிந்தவன் நல்லவன் ஆகிறான்
உள்ளத்தை உரைப்பவன் கெட்டவன் ஆகிறான்
 
நான் இப்படித்தான் உறவுகளிடம் பெயர் பெற்று இருக்கிறேன். இதை என்னால் மாற்றிக் கொள்ள இயலாது. காரணம் நடிப்பு எனக்கு என்றுமே உடன் படுவதில்லை.
* * * * * * * * * * 12 * * * * * * * * * *
 
Chivas Regal சிவசம்போ-
பொழைக்கத் தெரியாத பொன்னம்பலம்
 
கில்லர்ஜி அபுதாபி