வாழவந்தானும், வாத்து மடையனும்

வணக்கம் வாழவந்தான் அண்ணே நல்லா இருக்கீங்களா ?
வாடா வாத்து மடையா நல்லா இருக்கேன்டா.. என்ன இந்தப்பக்கம் ?
சில சந்தேகங்கள் வந்துச்சு உங்கள்ட்ட கேட்டுப் போகலாம்னு வந்தேன்ணே...
கேளுடாத்தம்பி அண்ணேஞ் சொல்றேன் ?
 
பொது இடத்தை ஆக்கிரமிப்பு செஞ்சு வீடு கட்டுனா தப்பாண்ணே ?
ஆமாடா பிறகு நீதி மன்றம் ஆணையிட்டு வீட்டை இடிச்சு தரை மட்டமாக்கிட்டு போயிடுவாங்க...
அப்படீனாக்கா... புறம்போக்கு இடத்துல மதுரையில கட்டி இருக்காங்களே... சென்னை ஐகோர்ட்டு அதை யாருண்ணே கேட்கிறது ?
? ? ?
 
மின்சாரக் கம்பத்திலிருந்து கொக்கி போட்டு மின்சாரம் எடுத்தா தப்பாண்ணே ?
ஆமாடாத்தம்பி பிறகு காவல்துறையில புகார் கொடுத்து அவங்க வந்து கைது பண்ணிட்டு போயிடுவாங்க...
அப்படீனாக்கா... புறம்போக்கு இடம்னு தெரிஞ்சும் பணம் கட்டுனா இணைப்பு தர்றாங்களே அவங்களை யாருணே கைது செய்வாங்க ?
? ? ?
 
நாம சில நேரம் டாஸ்மாக் போயிட்டு வரும்போது போதையில சாலையில போற பேருந்தை நிறுத்தி வச்சா தப்பாண்ணே ?
பின்னே தப்பு இல்லையா பிறகு வண்டியில இருக்கிறவங்களே.. உன்னை தூக்கிட்டு போயி காவல் நிலையத்துல ஒப்படைச்சுருவாங்களே...
நாம ஒரு வண்டியை நிறுத்துறதே தப்புனா... அரசியல்வாதிங்க வரும்போது  நூத்துக்கணக்கான வண்டிகளை, ஆம்புலன்ஸை காவல் அதிகாரிங்களே நிறுத்தி வைக்கிறாங்களே... இவங்களை யாருணே தூக்கிட்டு போவாங்க ?
? ? ?
 
ஒரு மனுசனை வெட்டுறது தப்பாண்ணே ?
என்னடா கேள்வி கேட்கிறே... ?  கொலை செய்யிறது குற்றமில்லையா ? அந்த மாதிரி யாரையுமே வெட்டுறது தப்புதான், பிறகு ஜெயிலுதான்.
அப்படீனாக்கா, நம்ம சொடலை லாரியில அடிபட்டு செத்துப் போனவனை மார்ச்சுவரியில் வச்சு கூறு போட்டு பொட்டணமா கட்டித் தந்தாங்களே அது தப்பு இல்லையாண்ணே ?
? ? ?
 
போதையில தள்ளாடி நடந்து போனதுக்கு என்னோட சகலையை காவல் நிலையத்துக்கு கூட்டிட்டு போறாங்களே ஏண்ணே ?
தம்பி பொதுமக்களுக்கு இடையூராக நடந்துக்கிறது தப்புத்தானே அதனாலதான் காவல்துறை கைது செய்யிறாங்கடா...
அப்படீனாக்கா... டாஸ்மாக் கடையில ஜெயில் கம்பிக்குள்ளே நின்னு விக்கிறாரே அவரை யாருணே கைது பண்ணுவாங்க ?
? ? ?
 
ஏண்ணே வெடிகுண்டு வீசுனா தப்பாண்ணே ?
என்னடா முட்டாள்த்தனமா கேட்கிறே.. வெடிகுண்டு வீசி மக்கள் செத்துப் போனால் உன்னை சும்மா விடுவாங்களா ?
வெடிகுண்டு வாங்கிட்டு வந்துதானே வீசுறான்... அப்படீனாக்கா... வெடிகுண்டை தயாரித்து விற்கிறானே அவனை ஏண்ணே கைது பண்ணி உள்ளே போடலை ?
? ? ?
 
என்னண்ணே எதுக்குமே... பதில் சொல்ல மாட்றீங்க ?
தம்பி தப்பை தப்பு இல்லாம செய்தால் எதுவுமே தப்பு இல்லைடா.. இதுதான் இந்தியாவில் அரசியல்வாதிகள் வகுத்த சட்டம்.
? ? ?
 
கில்லர்ஜி தேவகோட்டை
 

காணொளி

Share this post with your FRIENDS…