தம்பட்டம்

வணக்கம் நட்பூக்களே... நமது அரசியல்வாதிகள் எவ்வளவோ திட்டங்கள் தீட்டினோம் அதை சாதித்தோம், இதை சாதித்தோம் என்று தம்பட்டம் அடிக்கின்றார்கள். இந்தியாவிலேயே முதல் மாநிலம் என்றும், உலகத்திலேயே இரண்டாவது நாடு என்றும் சொல்கின்றார்கள், அடிப்படையில் மக்களுக்கு வேண்டியது என்ன ?

 

தம்பட்டம் அடிப்பதில் மத்திய, மாநில இரண்டு அரசுகளுமே சரி யாருக்கும் யாரும் சளைத்தவர்கள் இல்லை. ஆனால் நாமெல்லாம் இளைத்தவர்கள். எந்த வேலை எந்த அரசைச் சேர்ந்தது என்பதும் மக்களுக்கு புரியவில்லை, நாடாளுமன்ற உறுப்பினர் எதற்கு ? பாராளுமன்ற உறுப்பினர் எதற்கு ? இவர்களின் அன்றாட பணி என்ன ? இவர்கள் அவர்களை குற்றம் சுமற்றவும், அவர்கள் இவர்களை குற்றம் சுமற்றவும் காலங்கள் கடந்து விடுகின்றன. குற்றவாளிகள் யார் ? நிரபராதி யார் ? என்று மக்களுக்கு இறுதி வரையில் தீர்வு கிடைப்பதில்லை.

 

சரியாக ஐந்து ஆண்டுகள் முடிந்து விடவும் அரசியல்வாதிகளின் ஆட்டம் ஆரம்பமாகிறது. மக்களும் எல்லாவற்றையும் மறந்து மானங்கெட்டுப் போய் அவர்கள் போடும் பாவப்பணத்தை வாங்கி கொண்டு ஓட்டுப் போடுவது இதுதானே இந்தியா முழுவதும் நிகழ்ந்து கொண்டு இருக்கிறது. பிறகு நாடு சரியில்லை, வீடு சரியில்லை என்றால் ? முதலில் நீ சரியாக செயல்படுகிறாயா ? அதை சிந்திக்கும் திறன் இல்லை.

 

எப்படி இருக்கும் ? அறிவை மழுங்கடிப்பதற்குதான் மதுக்கடைகளை அரசே திறந்து வைக்கிறது. இரண்டு பெரிய கட்சிகளுக்கும் சாராய ஆலைகள் இருக்கிறது. யார் ஆட்சிக்கு வந்தாலும் இவர்களின் கடைகளில் கொள்முதல் செய்து கொள்வது என்பது இவர்களின் எழுதப்படாத சட்டம்.

 

 பிறகு எப்படி... மேடைகளில் இவரை அவரும், அவரை இவரும் புழுதி வாறி தூற்றிக்கொண்டு பேசுகின்றார்கள் ? இதுதான் மக்களை மாங்காய் மடையர்களாக வைத்துக் கொண்டு இவர்கள் செய்யும் சதுரங்க விளையாட்டு. இது மக்களுக்கு புரிவதேயில்லை. எனக்கு நன்றாக நினைவு இருக்கிறது. நான் சிறுவனாக இருக்கும் பொழுது கள்ளு குடிப்பவர்களை காவல்துறையினர் விரட்டி வந்து பிடித்து போவார்கள். அன்று அந்தச் செயல் கேவலமாக பார்க்கப்பட்டது இன்று ? 

 

சந்திர மண்டலத்தில் இந்திய ராக்கெட்டை இறக்கட்டும், வெளிநாட்டு வர்த்தகங்கள் இங்கு கொடிகட்டி பறக்கட்டும். பிரதமர் அடிக்கடி சொந்த விமானத்தில் உலகம் சுற்று வந்து பெருமை சேர்க்கட்டும். ஸ்விட்சர்லாந்து நாட்டின் வங்கிகளில், அரசியல்வாதிகளும், திரைப்படக் கூத்தாடிகளும், தொழில் அதிபர்களும் மில்லியன் கணக்கில் பணத்தை கொட்டி வைத்து விட்டு வெளியுலகம் தெரியாமல் மறைந்து போகட்டும். அடித்தட்டு மக்களுக்கு அவசியமான பயன் அரிசி விலையை குறைப்பது மட்டுமே...  இதை செய்வது யார் ?

 

கில்லர்ஜி அபுதாபி

 

காணொளி