இலுப்பக்குடி சாலையில்...

அன்றொருநாள் இலுப்பக்குடி சாலையில் எனது மகிழுந்தில் ஜலந்தரில் ஒரு நண்பரது திருமணத்திற்கு போய்க் கொண்டு இருந்தேன். உசிலம்பட்டி பிரிவு பாலத்தின் கீழே போனபோது... எனது முன்புறம் வெள்ளை நிறத்தில் ஒரு MARUTI SUZUKI SWIFT மகிழுந்து என்னைக் கடந்து போனது. அதில் ஒரு பத்து வயது குழந்தையை கடத்துவது போல் தெரிந்தது அதாவது குழந்தையை அடிப்பது போலிருந்தது. இதைக் கண்டதும் எனக்கு உடன் காவல்துறைக்கு தெரியப்படுத்த வேண்டும் என்று தோன்றியது.

 

உடன் அந்த மகிழுந்தின் எண்களை பார்த்தேன் PB10 EU1300 உடன் எனது அலைபேசியில் காவல்துறையின் அவசர எண் நூறுக்கு அழைத்தேன் எடுத்தவர் மலையாளத்தில் பேசிட, நானும் மலையாளத்தில் இந்த மாதிரி மாருதி வண்டி இந்த, இந்த மாதிரி என்று மாருதி வண்டியின் எண்ணும் சொல்லி முடித்ததும் நீங்கள் பின்னேலேயே விரட்டி போங்கள் நாங்கள் உடன் வருகிறோம் என்று சொல்லி வைத்தனர். நானும் உடனே அந்த வண்டியை பின் தொடர்ந்து செல்ல அவர்கள் என்னை முன் கடந்தனர்.

 

சற்று நேரத்தில் காவல்துறையின் ஜீப் என்னிடம் கையைக் காண்பித்து விட்டு அந்த வண்டியை விரட்டி பிடித்து முன்புறம் சென்று நிறுத்திட அந்த வண்டியும் நின்றது. அதன் பின்னே நானும் நிறுத்தினேன். போலீஸார் அவர்களிடம் கதவைத் திறக்கச் சொல்லி உள்ளே பார்க்க, உள்ளே முன்புறத்தில் கணவர் ஓட்டுனர் இருக்கையில் இருக்க, பக்கத்தில் மனைவியும், பின்புற இருக்கையில் இரண்டு குழந்தைகள் மய்யமாக ஒரு ஆளுயரப் பொம்மையை வைத்து விளையாடிக் கொண்டு இருந்தனர்.

அந்த குடும்பத்திடம் எங்கிருந்து வருகிறீர்கள் ? என்று போலீஸார் கேட்க, அவர்கள் ஆந்திராவிலிருந்து வந்து இருப்பதாக தெலுங்கில் மாட்லாடினார்கள். வண்டி பஞ்சாப் ரெஜிஸ்ட்ரேஷனாக இருக்கிறதே ? என்று கேட்க, எங்க நைனா இங்குதான் இருக்கிறார். அவரோட வண்டி என்று, ஆர்.சி.புக்கையும் தனது ஆந்திரா ஓட்டுனர் உரிம அட்டையையும் எடுத்து காண்பிக்க, டிக்கியையும் திறந்து பார்த்த போலீஸ் அவர்களை அனுப்பி விட்டு, என்னை முறைத்து பார்த்து விட்டு எனது ஐயிட்டங்களை கேட்டனர்.

 

நான் முழித்துக் கொண்டே எடுத்துக் கொடுத்தேன் வாங்கி நான்காயிரம் ரூபாய் மட்டும் அபராதம் விதித்து பேப்பரை கொடுத்து நாளை மறுதினத்துக்குள் கட்டவேண்டும் இல்லாவிட்டால் பஞ்சாப் சுங்கச்சாவடியை தாண்ட முடியாது என்று எச்சரித்து விட்டு ஊருக்கு போய் கண் மருத்துவரை உடனே பாரு என்று சொல்லிச் சென்றனர்.

 

அசடு வழிந்து தலையாட்டினேன் மகிழுந்தில் உட்கார்ந்து முன்புறக் கண்ணாடியை பார்த்தேன் அது, இது உனக்கு தேவையா ? என்று கேட்பது போலிருந்தது. திருமணத்துக்கு சென்று சாப்பிடும் முன்பே மொய் எழுதியதை நான் யாரிடம் சொல்ல.... ?

 

கில்லர்ஜி தேவகோட்டை

 

Chivas Regal சிவசம்போ-

பஞ்சாபி போலீஸ் மலையாளத்திலும், தெலுங்கிலும் பேசுனாங்களா... என்னையா இது காலக்கொடுமை ?

 

காணொளி

Share this post with your FRIENDS…