நீலகிரி, நீட்தேர்வு நீலாவதி

நீட் தேர்வு எழுத நீட்டாக உடை அணிந்து சென்ற மாணாக்கர்களை குறிப்பாக பெண்களை இப்படி தலைவிரி கோலமாக அலங்கோலப்படுத்தி உள்ளே அனுப்புகின்றார்கள். தேர்வு நேரலை காணொளியில்தான் நிகழ்கிறது மேலும் ஆசிரியர்கள் குழுவும் சுழன்று வருகிறது அதன் மத்தியில் தேர்வு எழுதுபவர்கள் தவறு செய்து விடமுடியுமா ? அரபு நாடுகளிலும் தேர்வு நிகழத்தான் செய்கிறது அங்கு பெண்களை முக்காடு போடக்கூடாது என்று சொல்ல முடியுமா ?

இவையெல்லாம் ஒன்றை நோக்கமாக வைத்து மதப்பிரச்சனையை வளர்ப்பதற்கு கொண்டு வரும் கேவலமான யூகங்கள் இதை மக்கள் முதலில் உணரவேண்டும். அரசியல்வாதிகளின் அடிவருடிகள் தலைவன் என்ன செய்தாலும் அதில் தவறு காணும் நோக்கில் வாழமாட்டான். காரணம் அவனால் இந்த சமூகத்தில் தனியாக சென்று உழைத்து வாழமுடியாது. ஆள் பலசாலியாக இருக்கின்றான் என்பது அரசியல்வாதிகளின் பயன்பாட்டுக்கு கலவரங்களை தூண்டுவதற்கு மட்டும்தான்.

ஆனால் சராசரி மக்களுக்கு சிந்திக்கும் திறன் இருக்கிறதே... ஆம் மருத்துவம் படிப்பதற்கு யாருமே முன்வரவில்லை எனில் இந்த அரசு என்ன செய்யும் ? இது நடவாத காரியம்தான். பக்கத்து நாடான இலங்கையின் இன்றைய நிலைப்பாட்டை கண்டும் காணாதது போல் நாம் வாழக்கூடாது. அதில் பாடம் கற்க வேண்டும். விலைவாசி உயர்ந்து கொண்டே போகிறது இதனை தட்டிக் கேட்கும் வழிமுறைகளை மக்கள் மக்களுடன் கலந்து ஆலோசிப்பதில்லை. அதேநேரம் அரசியல்வாதிகள் ஏதாவது மதப்பிரச்சனையை கிளப்பி விட்டால் பற்றிக்கொண்டு அடித்துக் கொள்ல்வது.

முன்பொரு நிகழ்வு நெதர்லாந்து என்று நினைவு சரியாக ஞாபகம் இல்லை மன்னிக்கவும். எரிபொருளின் விலையை லிட்டருக்கு அந்த நாட்டின் பணத்தில் ஐம்பது காசுகள் உயர்த்தி இருக்கிறார்கள். மக்கள் யாரிடம் எப்படி கலந்து பேசினார்கள் ? என்பது எனக்கு இன்னும் புலப்படவில்லை ஒருவேளை இன்றைய விஞ்ஞான வளர்ச்சியில் உதவியால் புலனம் வழியாககூட இருக்கலாம். மறுதினம் மக்கள் அனைவரும் நாடு முழுவதும் சாலையில் சென்றவர்கள் அப்படியே வாகனங்களை நிறுத்தி விட்டு இறங்கி நடக்க ஆரம்பித்தார்கள். இதன் மூலம் அரசுக்கு மக்கள் சொல்வது என்ன ?

எனக்கு வாகனம் வேண்டாம் நீயே எடுத்துக்கொள். நீ எரிபொருளை எப்படி விற்கிறாய் என்று பார்க்கிறேன் ? சலனமில்லாத. கல்லெறியாத, வசைபாடாத, கோஷம் போடாத, தீ வைக்காத, வெடிகுண்டு வீசாத, சத்தமில்லாத யுத்தம். காவல்துறையால் என்ன செய்ய முடியும் ? அபராதம் விதிக்க முடியுமா ? எத்தனை நபருக்கு ? எனக்கு வாகனமே வேண்டாம் என்றபோது... இவைகளை தூக்கிக்கொண்டு போய் எங்கு வைப்பாய் ? ஏற்கனவே வாகன நிறுவனங்களில் புதியது நிறைந்து நிற்கிறதே... அவர்களின் எதிர்காலம் ?

அரசின் அவசரகால கூட்டம் அடுத்த நான்கு மணிநேரத்தில் அரசின் அறிவிப்பு இனி எப்பொழுதும் விலை உயராது. உத்திரவாதமான அறிக்கை. மீண்டும் மக்கள் வாகனங்களை எடுத்து சாலைகளை காலி செய்திட இருபத்து நான்கு மணிநேரத்திற்கும் மேலாக காலம் தேவைப்பட்டு இருக்கிறது. மக்களின் வாழ்வு நிகழ்வுக்கு வருகிறது. இந்த அரசை நல்ல அரசு என்றுதானே பாராட்ட வேண்டும் ? சரி அவர்களுக்கு இந்த புத்தியை கொடுத்தது மக்கள்தானே ? அவர்களும் புத்திசாலிகள்தானே... 

நாமும் இவர்களைப் போல் அறப்போர் புரிவது எப்போது ? காந்தி பிறந்த மண் என்று சொன்னால் மட்டும் போதுமா ? இதை நிரூபிக்க வேண்டியவர்கள் நாமல்லவா ? மாற்றம் தேவை அது நமக்கல்ல நமது சந்ததிகளின் எதிர்கால நல் வாழ்வுக்காக... இனியெனும் சிந்திக்க முயல்வோம்.

கில்லர்ஜி தேவகோட்டை

சிவாதாமஸ்அலி-
எவனுமே குடிக்கவில்லை என்றால் டாஸ்மாக் கடையை தானாகவே தமிழக அரசு மூடிடும் இது மக்களுக்கு குடிகார மக்களுக்கு தெளியாதா... இல்லை புரியாதா ?

Share this post with your FRIENDS…